જર્મનીમાં ભણતા મિતેશભાઈએ મોહનથાળ અને પેંડાની રીત માટે વિનંતી કરી છે.એમાંથી અહીં મોહનથાળની રીત રજૂ કરીએ છીએ. પેંડાની રીત હવે પછી પોસ્ટ કરીશું.

એક અન્ય વિનંતી પંજાબી વાનગીની રીત મૂકવા માટે પણ આવી છે પણ જણાવવાનુ કે હાલ માત્ર દેશગુજરાતની રસોઈ હેલ્પલાઈનનું ફોકસ માત્ર ગુજરાતી વાનગીઓ પર જ છે.

ઉદેપુરથી રાજીવભાઈ લખે છે કે તેઓ દેશગુજરાત પર આવેલી દરેક વાનગી નોંધી લે છે અને વધુ વાનગી આપવા વિનંતી તો રાજીવભાઈને જણાવવાનુ કે ડાયરીમાં બહુ બધા કોરા પાના છે ને ? ચૂંટણીનું કવરેજ પતે એટલે દેશગુજરાત પર વાનગીઓની રેસીપીની ભરમાર ચાલુ થશે.

સામગ્રી: ૧ કપ ચણાનો કગરો(જાડો) લોટ, ૧ કપ ખાંડ, ૧ કપ ઘી, ૫૦ ગ્રામ માવો, ૧ ચમચી બદામ પીસ્તાની કતરી, ચાંદીનો વરખ, થોડુ કેસર, થોડી ઈલાયચી વાટેલા

રીત: ૧ થાળીમાં ચણાનો લોટ લઈને વચ્ચે ખાડો કરી ૧ ચમચી દૂધ મૂકી પાંચ મિનીટ ઢાંકી દો અને પછી તેને ચાળે લો.

એક તપેલીમાં ખાંડ લઈ તેમાં ડૂબે એટલું પાણી લઈ ચાસણી કરવા ધીમા તાપે ગેસ પર મૂકો. પાણી ઉકળે એટલે તેમાં ૨ ચમચી દૂધ નાખો જેથી ખાંડનો કચરો ઉપર આવી જશે. આ કચરો કાઢી નાખો. જ્યારે થાળીમાં ટપકુ પાડો ને એ ટપકુ રેલાય નહી ત્યારે સમજવુ કે ચાસણી થઈ ગઈ છે. તેમાં કેસર ઈલાયચીનો ભૂકો ઉમેરો. પછી તેને ગેસ પરથી ઉતારી લો.

એક તવામાં ઘી ગરમ કરવા મૂકી એમાં ચાળેલો ચણાનો લોટ ધીમા તાપે શેકો. ધીરે ધીરે ગુલાબી થવા માંડશે. ઘેરો ગુલાબી થતા તેમાં માવો ઉમેરો અને પાંચ દસ સેકંડ માટે શેકો અને પછી ગેસ પરથી નીચે ઉતારી તેમાં ગરમ ચાસણી ઉમેરી હલાવતા રહેવું. જ્યારે તે ઠરવા લાગે ત્યારે થોડું ઘી લગાડી તૈયાર રાખેલી થાળીમાં પથરવું. તેની પર તરત જ બદામ પીસ્તાની કતરી પાથરી ન દેવી નહીં તો તેમા ચોંટશે જ નહી. ત્યારબાદ તરત જ તેની ઉપર ચાંદીનો વરખ પાથરી દેવો.ઠંડુ પડતા ચોસલા પાડી દેવા.સ્વાદિષ્ટ મોહનથાળ તૈયાર.

(C) Rupam’s Gujarati Vaangi Vangi Rasoi Cuisine mithai Cooking recipe, Ahmedabad Gujarat.