Click here To Play this Video

દિલ્હી, દેશગુજરાત

દિલ્હીના જંતર મંતરની ફૂટપાથ પર દેશભરના નારાજ, નિરાશ અને સિસ્ટમ સામે ફરિયાદ ધરાવનારાઓ ટેન્ટ નાખીને પોતાનો વિરોધ વ્યક્ત કરતા હોય છે. અહીં માત્ર એક મંડપ હાલ ગુજરાત વિષયક વિરોધનો છે. આ છે રાજકોટ જિલ્લાના નાનકડા ગામના ભૂકંપ પિડીતભાઈ કે જે ભૂકંપ પછી રાજકોટ કલેક્ટર ઓફિસ સામે ફૂટપાથ પર ભૂકંપ રાહતમાં થયેલા ભ્રષ્ટાચાર સામે ધરણા પર ઉતર્યા હતા. તેઓ દરરોજ કલેક્ટર ઓફિસ જઈને એક આવેદનપત્ર આપતા હતા. એક દિવસ તેઓ આવેદન પત્ર આપવા ગયા અને રાજકોટ મ્યુનિસિપલ કોર્પોરેશને એમના ડેરા તંબુ ઉઠાવી લીધા ને માલસામાન જપ્ત કરી લીધો. આ પછી આ ભાઈએ દિલ્હી આવીને એક વર્ષથી વધુ સમયથી ધરણા શરૂ કર્યા છે પણ અહીં ગુજરાતના કોઈ નેતા એમને પૂછવાય આવ્યા નથી.

દોઢ વર્ષથી દિલ્હીની ફૂટપાથને ઘર બનાવીને રહેતા આ ગુજરાતી ગ્રામીણભાઈ ફૂટપાથ પર જ આવેલા સાર્વજનિક શૌચાલય અને સ્નાનવ્યવસ્થાનો લાભ લે છે, ફૂટપાથ પર જ એમની પત્ની રસોઈ બનાવી કાઢે છે.ક્યારેક ફૂટપાથ પર નીકળતા મોટા ઉંદરડા હેરાન કરે છે તો ક્યારેક કીડીઓ દર બનાવી કાઢે છે. ક્યારેક પોલીસ ભ્રષ્ટાચાર સામે ધરણા કરનારાઓ પાસેથી હપ્તો માંગીને ભ્રષ્ટાચારની હદ વટાવે છે તો ક્યારેક દારૂડિયાઓ હેરાન કરે છે. પણ આ ભાઈનો વિરોધ ચાલુ છે. ભૂકંપ રાહતના ગોટાળાનો નિવેડો ન આવે ત્યાં સુધી તેમણે દાઢી વધારવાની પણ પ્રતિજ્ઞા લીધી છે.

પણ આ આખા પ્રકરણની સૌથી દુ:ખદ બાબત એ છે કે આ ભાઈ ધરણા પર એમની દીકરી અને દીકરાને પણ લઈ આવ્યા છે. દીકરા દીકરી બંને ભૂકંપ પહેલા સ્કૂલે જતા હતા પણ હવે સ્કૂલ છોડીને ગામ છોડીને દિલ્હીની ફૂટપાથ પર મા બાપ સાથે દિવસો પસાર કરવા પડી રહ્યા છે. ગુજરાતે કમસેકમ આ દીકરા દીકરીની ચિંતા કરીને તેમને ફૂટપાથ પરથી છોડાવી તેઓ ફરીથી સ્કૂલમાં ભણતા થાય એ જોવુ જોઈએ.

ગુજરાત સરકારે આ ભાઈની સમસ્યાનો અંત લાવીને પરત તેમના ગામડે લાવવાનો સિન્સીયર પ્રયત્ન કરવો જોઈએ એ તો ખરૂજ પણ કમસેકમ પહેલામાં પહેલી તકે આ દીકરીને અને તેના ભાઈને ગુજરાત લાવી સ્કૂલમાં ભરતી કરવા જોઈએ. જંતરમંતરની ફૂટપાથ કે જ્યાં દેશભરના સમસ્યાગ્રસ્તો જમા થાય છે ત્યાં આ ભૂકંપ પિડીત ગુજરાતીનો ટેન્ટ લાગેલો હોય, ગુજરાતની એક દીકરી અને દીકરો સ્કૂલે જવુ હોવા છતા ફૂટપાથ પર વેડફાઈ જતા હોય એ ગુજરાત માટે પણ શોભતુ નથી અને ગુજરાત સરકાર માટે પણ.

આજે ૨૬ જાન્યુઆરીએ ગુજરાત ભૂકંપની તિથિ નિમિત્તે દેશગુજરાત તરફથી ગુજરાત, ગુજરાતીઓ અને ગુજરાત સરકારને આ વિડિયો અર્પણ છે.