-દેખીતી જ રીતે ગ્રાઉન્ડ ફ્લોર પરની બેંકવાળાઓની અક્કલ ચાલે તો ઉપરના ત્રણ માળની શકુંત હોટેલવાળાઓની પણ હોટેલ ખાલી કરાવવાની અક્કલ ચાલવી જોઈએ પરંતુ કહેવાય છે કે રવિવારે રેલવે રિક્રુમેન્ટ બોર્ડની પરીક્ષા હોવાથી બહારગામથી ઘણા વિદ્યાર્થીઓ આવશે ને હોટેલમાં રોકાશે એવી લાલચે હોટેલ માલિકે હોટેલમાં ગ્રાહકો લેવાના ચાલુ જ રાખ્યા અને રવિવારે સવારે સાડા આઠ વાગ્યે બિલ્ડીંગ પડ્યુ.

-અમદાવાદ મ્યુનિસિપલ કોર્પોરેશને મોતીમહેલ હોટેલ વાળા કે જેમણે બેજવાબદારી પૂર્વક પાડોશના મકાનના પાયાથી ઉંડો ખાડો કર્યો તેથી તેમની સામે તથા હોટેલ ભયજનક હોવાની મ્યુનિસિપલ કોર્પોરેશને મૌખિક સૂચના આપી હોવા છતા તેમાં ગ્રાહકો ભરનાર હોટેલ માલિક ગૌરાંગ જાની સામે પોલીસ ફરિયાદ નોંધાવી છે.

ફોટામાં દેખાય છે તે છે રમણ લક્ષમણ. વીસ વર્ષનો આ યુવાન રવિવારે અમદાવાદની શકુંત હોટેલની દુર્ઘટનામાં કઈ રીતે જીવતો બચી નીકળ્યો એની કહાની રસપ્રદ છે. રમણ ચાર માળના શકુંત હોટેલના બિલ્ડીંગમાં વેઈટર તરીકે કામ કરે છે. રવિવારે સવારે તે ત્રીજા માળે હતો ત્યાં જ નીચે કાચ ફૂટ્યો અને કાઉન્ટર પરના જાલમભાઈએ બૂમ પાડી કે બધા નીચે આવી જાવ. આ સાથે જ હોટેલ શકુંતનું બિલ્ડીંગ પડ્યુ. બધો ખેલ એક સેકન્ડમાં જ થઈ ગયો પણ એક સેકંડથીય ઓછા સમયમાં રમણે વિચારી લીધું કે હોટેલમાં પગથિયેથી નીચે ગયા તો મર્યા જ સમજો. ઢળતા બિલ્ડીંગમાંથી કૂદી પડવાનું શ્રેષ્ઠ છે. આ સાથે જ રમણ સાડા ચૌદ મીટરની ઉંચાઈએથી એટલેકે ત્રણ માળ પરથી બારીમાંથી નીચે કૂદી ગયો. એ તો રમણનું નસીબ જ કહી શકાય કે એ નીચે લારી પર પડ્યો અને તેથી તેને પગે થોડો દુ:ખાવો રહે એટલુ જ વાગ્યુ બાકી તો તે ચાલતો ચાલતો જ રોડ પાર કરી ગયો. રમણ કહે છે કે તેની સાથે અન્ય એક વેઈટર ભૂરેસિંઘ પણ કૂદ્યો હતો. ભૂરેસિંઘ ગુજરાતના પંચમહાલ જિલ્લાનો વતની છે. ભૂરેસિંઘ કૂદ્યો પણ કાટમાળ પર જ પડ્યો એટલે ઘાયલ થયો અને હાલ સિવીલ હોસ્પિટલમાં સારવાર હેઠળ છે.