અમદાવાદ, દેશગુજરાત

અમદાવાદમાં હાલમાં જ એસજી હાઈવેના દેવ આર્ક મોલમાં સિનેમેક્સ મલ્ટિપ્લેક્સ ખુલ્યુ. આ સાથે યુવાનોમાં ચર્ચા જામી છે કે ઓહો! આપણા શહેરમાં કેટલા બધા મલ્ટીપ્લેક્સ? પણ યુવાનોને કહેવાનું કે ભઈ જરા થોભો. હજુ તો બીજા પણ ઘણા મલ્ટીપ્લેક્સ આવી રહ્યા છે અમદાવાદમાં અને ગુજરાતમાં. એ બધા ખુલી જાય પછી તમે તમારે નિરાંતે ચર્ચા કરજો.

અમદાવાદના બિલ્ડર ચીમન અગ્રવાલે આશ્રમ રોડ પર પહેલવહેલુ સીટીગોલ્ડ મલ્ટીપ્લેક્સ ખોલ્યું હતુ. આ પછી તેમણે બાપુનગરમાં અને છેલ્લે શ્યામલ ચાર રસ્તા પર બીગ બઝાર વાળા બિલ્ડિંગમાં સીટીગોલ્ડ મલ્ટીપ્લેક્સ શરૂ કર્યા છે. હવે તેઓ ચોથુ મલ્ટીપ્લેક્સ મોટેરા સ્ટેડિયમ નજીક ઉભુ કરવાના છે જેમાં બે સ્ક્રીન હશે અને ૮૦૦ બેઠકો હશે. આ સિવાય બીજા બે મલ્ટીપ્લેક્સ તેઓ આંબલી(બોપલ) અને સૈજપુર બોઘામાં બનાવવાના છે. અગ્રવાલોએ અહીંથી જ નથી અટકવુ. તેઓ આ ઉપરાંત પણ અમદાવાદમાં જ અન્ય ચાર મલ્ટીપ્લેક્સ ઉભા કરવા માંગે છે અને અમદાવાદમાં સીટીગોલ્ડ બ્રાન્ડના કુલ દસ મલ્ટીપ્લેક્સ શરૂ કરવાની યોજના બનાવી દીધી છે.

અમદાવાદના તક્ષશિલા બિલ્ડર્સવાળા પૂર્વ અમદાવાદમાં બે મલ્ટીપ્લેક્સ ઉભા કરવાના છે જેમાંનુ એક તેમના મોલ પ્રોજેક્ટના જ ભાગરૂપે હશે. ઉપરાંત તક્ષશિલાવાળા સુરત, વડોદરા અને જુનાગઢમાં એક એક મલ્ટીપ્લેક્સ શરૂ કરવાના છે.

કુંજ ઈન્ફ્રાસ્ટ્રક્ચર વાળાઓ અમદાવાદના પૂર્વના નિકોલમાં સાડા ચાર કરોડનું મલ્ટીપ્લેક્સ ઉભુ કરવાના છે. કુંજ આ માટે આઈનોક્સ સાથે જોડાણ કરી રહ્યુ છે. મલ્ટીપ્લેક્સમાં ત્રણ સ્ક્રીન હશે અને એક હજાર બેઠકો હશે.

રિલાયન્સના અનિલ ધીરુભાઈ અંબાણી-અડગ ગ્રુપવાળાઓ મલ્ટીપ્લેક્સના ધંધામાં એડલેબ્સના બ્રાન્ડનેમથી પડ્યા છે પરંતુ ટૂંક સમયમાં તેઓ એડલેબ્સ નામ ત્યજીને મલ્ટીપ્લેક્સ બિઝનસને પણ ‘બીગ’ની બ્રાન્ડ હેઠળ લાવવાના છે. અમદાવાદના ડ્રાઈવ ઈન રોડ પર હિમાલયા મોલમાં તો એડલેબ્સનું એક મલ્ટીપ્લેક્સ છે જ. ઉપરાંત એડલેબ્સ કચ્છના ગાંધીધામના મધુબન અને જામનગરના મેહુલ સિનેપ્લેક્સમાં મેનેજમેન્ટ હસ્તક કરીને જોડાયુ છે.

બીજી તરફ અમદાવાદમાં શરૂ થયેલુ સિનેમેક્સ અગાઉ હિંમતનગર અને ગાંધીનગરમાં પોતાની હાજરી ધરાવે જ છે પણ હવે વડોદરા, રાજકોટ, આણંદ, સુરત અને મહેસાણામાં પણ મલ્ટીપ્લેક્સ શરૂ કરવાનુ છે.