સ્પેનથી પીંકુએ દેશગુજરાત.કોમની વાનગી હેલ્પલાઈન પાસે વડાપાંઉ બનાવવાની રીત માંગી છે. તો પીંકુ(ભાઈ કે બહેન?)જી વડાપાઉં તમે એકલા એકલા તો ખાશો નહીંને ? વીસ વ્યક્તિઓ માટેના વડાપાંઉ તૈયાર કરવાના માપના આધારે આ રીત આપુ છું એટલે આમ કહું છું. તમારે જેટલી વ્યક્તિ માટે તૈયાર કરવા હોય એ પ્રમાણે માપમાં વધઘટ સમજી લેજો.

સામગ્રી:અઢીસો ગ્રામ બટાકા, પ્રમાણસર તેલ, અર્ધી ચમચી રાઈ, બે ચમચી અડદની દાળ, મીઠો લીમડૉ, ચોથા ભાગની ચમચી ભરીને હળદર, ૧ ચમચી તલ, ૩ નંગ ઝીણી સમારેલી ડુંગળી, ૧ ચમચી વાટેલા આદુ મરચાં, બે ચમચી ઝીણી સમારેલી કોથમીર, ૧ નંગ લીંબુ, બે ચમચી ખાંડ, ગળી ચટણી, તીખી ચટણી, લસણની ચટળી, ઝીણી સેવ, વીસ ભાજીપાઉંની બ્રેડ, ઘી અને માખણ, ચણાનો પ્રમાણસર લોટ, અર્ધી ચમચી મરચું, પ્રમાણસર મીઠું.

રીત: બટાકાને બાફી, છોલીને છીણી નાખવા. બે ચમચી તેલમાં રાઈ, અડદની દાળ, લીમડો, તલ, હળદર અને ઝીણી સમારેલી ડુંગળી નાખો. કથ્થાઈ થવા દો.

હવે બટાકા અને બાકીનો મસાલો નાખો. બટાકાવડા ચપટાં વાળીને ચણાના લોટના ખીરામાં બોળીને તેલમાં તળી લો.

ભાજીપાઉંની બ્રેડને વચ્ચેથી સહેજ કાપીને માખણ લગાડી, ગળી ચટણી, લસણની ચટણી, તીખી કોથમીરની ચટણી પાથરીને તેના પર બટાકાવડું મૂકીને ફરીથી ત્રણેય ચટણી પાથરીને બંધ કરો.

લોઢી પર ઘી, તેલ મૂકીને બંની બાજુ શેકો. તેની ઉપર સેવ, કોથમીર ભભરાવો.

વડાપાંઉ તૈયાર.

(C) Rupam’s Gujarati Vaangi Vangi Rasoi Cuisine mithai Cooking recipe, Ahmedabad Gujarat.