વિશ્વ હિંદુ પરિષદ સામે નરેન્દ્ર મોદીએ તાણેલું નાળચું એ માત્ર વધુ એક પોલીસ કેસ છે કે પછી નરેન્દ્રભાઈના અંટસવાળા સ્વભાવનું એક્સ્પ્રેશન છે કે રાષ્ટ્રિય રાજનીતિમાં સ્વીકાર્ય બનવાનું પા પા પગલી પ્રયાણ છે?

ન્યાયગત

પહેલો ઓપ્શન:સરકારને વાંધાજનક લાગતા એસએમએસ ફરતા હશે. ગાંધીનગરમાં ફરતા હશે એટલે વગદાર વ્યક્તિઓ સુધી પણ પહોંચ્યા હશે. એટલે તપાસ શરૂ થઈ હશે અને પગેરું વિશ્વ હિંદુ પરિષદના મહામંત્રી અશ્વિન પટેલના મોબાઈલ ફોન સુધી પહોંચતું હશે. પોલીસે તેની ચેનલ મારફતે છેક ઉપર પૂછી લીધું હશે. ઉપરથી એટલેકે ગુજરાતની સર્વોચ્ચ ઓફિસથી વાયા ચેનલ ‘યેસ’ આવી ગયું હશે એટલે પોલીસે શાનથી અશ્વિન પટેલને ફ્રેમ કરી દીધો હશે.

ઉપરના ઓપ્શનમાં પ્યોરલી ન્યાયી પ્રક્રિયાની એટલેકે ન્યાયસંગત વાત છે તો હવે બીજો ઓપ્શન વિચારીએ તો વાત સ્વભાવગત હોઈ શકે છે.

સ્વભાવગત

નરેન્દ્રભાઈએ તેમના અંટસવાળા સ્વભાવથી આ એક્શન લીધું હોય અથવા એપ્રૂવ કર્યું હોય તેવી શક્યતા હોઈ શકે.

નરેન્દ્રભાઈને એક સમયે સ્વ.હરેન પંડ્યા સાથે અંટસ પડી ગઈ હતી અને હરેનને તેમણે એલિસબ્રીજ વિધાનસભામાંથી નહતો જ લડવા દેવો. પરંતુ હરેનને અડવાણી સાથે ડાયરેક્ટ કનેક્શન હતું. અડવાણીજીએ હરેનની ટિકીટને ગ્રીન સિગ્નલ આપી દીધું તો નરેન્દ્રભાઈ વહેલી સવારે છાતીમાં દુ:ખાવો છે એમ કહીને અમદાવાદની યુએન મહેતા હોસ્પિટલમાં દાખલ થઈ ગયા હતા. ગાંધીનગર અને અમદાવાદમાં સૌ કોઈ જાણતું હતું કે હરેનને ટિકીટ આપો તો પોતે ચૂંટણી જંગમાંથી જ ખસી જાય અને તબિયતના બહાને ગ્રાઉન્ડ થઈ જાય તેવુ આ ત્રાગુ હતુ. હરેન પંડ્યા તો નરેન્દ્રભાઈને હોસ્પિટલમાં મળવા પણ ગયા હતા અને પછી જાતે જ પક્ષના હિતમાં એલિસબ્રીજની બેઠકની દાવેદારી છોડી દીધી હતી. નરેન્દ્રભાઈ હોસ્પિટલમાંથી છૂટીને પ્રથમ વખત ખોખરાની જાહેરસભામાં દેખાયા હતા અને એક પત્રકાર તરીકે મેં એમને સ્ટેજ પાસે જઈને બીજા પત્રકારો સાથે ઉભા રહી પૂછ્યું હતું કે તબિયત કેવી છે? નરેન્દ્રભાઈ આનો જવાબ આપ્યો ન હતો અને હસીને વાત જવાદો એવો ઈશારો કર્યો હતો.

આ પ્રસંગ મેં એટલા માટે લખ્યો છે કે નરેન્દ્રભાઈને જો કોઈની સાથ અંટસ પડી જાય તો સંઘ શું ને અડવાણી શું? બધાએ હાથ જોડવા પડે ને તોય નરેન્દ્રભાઈ કરે તો પોતાનું ધારેલુંજ. વાત એક્સ્ટ્રીમ પર પહોંચી જાય. નરેન્દ્રભાઈની વિશ્વ હિંદુ પરિષદ સાથેની અંટસ એવી ગહેરી લાગે છે કે વિહિપએ અમરનાથ મામલે આખા ભારતમાં બંધ આપ્યો તો ભાજપે તેને સમર્થન આપ્યું પણ ગુજરાતમાં નરેન્દ્રભાઈએ પુરૂષોત્તમ રૂપાલાને કામે લગાડી દીધા. રૂપાલાએ દિલ્હી રાજનાથ સિંઘની પરવાનગી લઈને ગુજરાતમાં બંધને ભાજપનો સપોર્ટ ન હોવાનું જાહેર કરી વિહિપના બંધનું સૂરસૂરિયું કરવાનું કામ કર્યું. ગુજરાતમાં બંધ રથયાત્રા આવી રહી હોવાથી બાકાત રખાયો. વિહિપ બાબતે ભાજપના આવા તો નાના મોટા અનેક પગલાના ઉદાહરણો છે.

તો સામે પક્ષે વિહિપની મોદી તરફની અંટસના પણ આટલા જ ઉદાહરણ છે. સુરતના પાટીદાર સંમેલનમાં પ્રવીણ તોગડિયા પહોંચી ગયા હતા. આખું ગામ જાણે છે કે આ સંમેલન મોદીની વિરૂદ્ધમાં ગુજરાતના પટેલોના નેતા તરીકે કેશુભાઈ પટેલને પ્રોજેક્ટ કરવા માટેનું હતું. પ્રવિણ તોગડિયા જેમના ગોડફાધર છે એવા ગોરધન ઝડફિયા ગામે ગામ ફરીને પટેલોને ભાજપ વિરૂદ્ધ લાઈન બંધ કરવાની કોશિશો કરતા હતા, વિહિપ તરફી સાધુઓની ભાજપને હરાવવા મોટી કાર યાત્રા નીકળી હતી. કેશુભાઈ પટેલના કાર્યકાળ દરમિયાન વીએચપીવાળાઓ પોલીસની બદલીથી માંડીને ચૂંટણીની ટિકીટ સુધીના નિર્ણયો પોતાના ભાજપને ચૂંટણી સમયે આપેલા સપોર્ટની ધાસ્તીએ દમ મારીને લેતા હતા.મોદીએ વિહિપ વગર ચૂંટણી લડીને જીતી બતાવી. વિહિપ બેકડોરમાં સામે પડ્યું હોવા છતા.

આમ મોદી વર્સીસ તોગડિયાનો મામલો પોલીટીકલ, ઈગોની, વર્તનકે વિચારની સ્ટાઈલની કે એમ્બીશનની અંટસનો કે ઘટનાઓ અને સંજોગોથી સર્જાયેલી એક્શન-રિએક્શનની હારમાળાનો હોઈ શકે છે.

વ્યૂહગત

હવે ત્રીજા અને સૌથી વધુ મહત્વના ઓપ્શનની વાત. રાષ્ટ્રિય રાજનીતિમાં વધુ સ્વીકાર્ય બનવા માટે નરેન્દ્રભાઈએ વિશ્વ હિંદુ પરિષદથી માત્ર દૂરી બનાવવાનું જ નહીં પણ પ્રોએક્ટીવલી તેની સામે પડવાનું પણ સ્ટ્રેટેજીકલી નક્કી કર્યું હોય તેવું શક્ય છે.

પણ આ ઓપ્શનમાં પણ બે સબઓપ્શન છે. એક એ કે નરેન્દ્રભાઈ રાષ્ટ્રિય રાજનીતિમાં અને ખાસ કરીને તો આવનારી લોકસભાની ચૂંટણીમાં ભારતભરમાં બહોળા સમાજમાં સ્વીકાર્ય વ્યક્તિ તરીકે પ્રચાર કરી શકે એ માટે સંઘે જ મોદી વર્સીસ વિશ્વ હિંદુ પરિષદનો આ પ્લોટ ઘડ્યો હોય જેમાં ટોપ કેડર ઈન્વોલ્વ હોય. નીચેની કેડર બૂમબરાડા કર્યા કરે. સંઘે કોઈપણ સંજોગોમાં આવનારી ચૂંટણીમાં ઈટાલીયન ખ્રિસ્તિ સોનિયા ગાંધીને ભારતની નિર્ણાયક વ્યક્તિના પદેથી દૂર કરવી છે.

મોદી આવતી ચૂંટણીમાં એક અનબાયસ્ડ, નિષ્પક્ષ અને કોઈની શરમ ન ભરનારા નેતા તરીકે બિહાર અને ઉત્તરપ્રદેશ તથા દક્ષિણ ભારત સુદ્ધામાં પ્રચાર કરી શકે એટલા માટે તેમની છબીને વળાંક આપવા પરિવારની ટોપ રેન્કની આ સ્ટ્રેટેજી હોય તેવું શક્ય છે.

ત્રીજા ઓપ્શનનો બીજો સબ ઓપ્શન એ કે પ્લોટ સંઘનો ન હોય અને મોદીએ જાતે જ નેશનલી સ્વીકાર્ય બનીને આગામી વર્ષોમાં અડવાણી પછીના નેશનલી સ્વીકાર્ય ભાજપી નેતા નંબર ટુ બનવું હોય અને વડાપ્રધાનપદ મેળવવું હોય અને આ માટે વિશ્વ હિંદુ પરિષદ મોદીના પૂતળા બાળે ને મિડિયા એને જુએ, પૂર્વ તથા દક્ષિણના બિનસાંપ્રદાયિક લીબરલ્સ તેને નિષ્પક્ષ મોદીના પરિપ્રેક્ષ્યમાં જુએ એવી તેમની અંગત એમ્બીશન ડ્રીવન ગેમ હોય.

ઉલ્લેખનીય છે કે ભારતના વડાપ્રધાન બનવું હોય તો લીબરલ હોવું ફરજીયાત છે. આખી વિદેશનીતિ ધર્મ આધારિત છે. મીડલ-ઈસ્ટના મુસ્લિમ દેશો તેલ આપે છે. યુરોપ અને અમેરિકા જેવા ખ્રિસ્તિ દેશો પૈસા આપે છે, સંરક્ષણના સાધનો આપે છે અને નાણાકિય તથા વ્યૂહાત્મક સહાય આપે છે.

ભારતમાં ઓરિસ્સામાં ખ્રિસ્તિ દેવળો પર હુમલા થાય તો ફ્રાન્સના રાષ્ટ્રપતિ મનમોહન સિંઘની ફ્રાન્સ મુલાકાત ટાણે મનમોહનસિંઘનો આ બાબતે જવાબ માંગે છે. ભારતમાં મુસ્લિમો પર વ્યાપક હુમલા થાય તો સાઉદી અરબ અને અન્ય મુસ્લિમ દેશોના રાજદૂતો વડાપ્રધાનને મળવા પહોચીજાય છે. મોદીએ આજે કોઈ પણ ખ્રિસ્તી કે મુસ્લિમ દેશમાં જવું હોય તો પહેલાં તો વિઝાની જ ચિંતા કરવી પડે છે.

આ તો થઈ વિદેશનીતિની વાત પરંતુ સ્વદેશનીતિની વાત કરીએ તો પણ દક્ષિણ ભારત અને પૂર્વ ભારતના ઘણા ખરા સેક્યુલર મતદારો અને ખાસ કરીને તો ભાજપના સાથી સેક્યુલર ઘટક પક્ષોમાં સ્વીકાર્ય થવા માટે પણ સેન્ટ્રીસ્ટ ચહેરો હોવો હાલના સંજોગોમાં તો અનઓફિશીયલી ફરજીયાત છે. આ વિસ્તારોમાં સ્કૂલોમાં લેફ્ટીસ્ટ-સેક્યુલર અવળો ઈતિહાસ ભણનારી પેઢીઓ તૈયાર થયેલી છે ને અખબારોનો રૂખ પણ આવો જ છે એટલે લોકોમાંનો એક ક્લાસ પ્યોર રાઈટવીંગ આઈડિયોલોજી મૂશ્કેલીથી સ્વીકારે છે.

હાર્ડકોર હિંદુત્વની સામે પડીને ઈમેજ ટ્રાન્સ્ફોર્મેશન કરવાની કવાયતમાં સફળતા ન મળે તો ન ઘરના ને ન ઘાટના એવી પરિસ્થિતી ઉભી થઈ શકે. એટલે મોદી આ કવાયત ધીમા પગલે અને વ્યૂહાત્મક રીતે હાથ ધરી રહ્યા છે. જેમ કે વિહિપના ભારત બંધને સમર્થન નહીં પણ તેનું કારણ રથયાત્રા બતાવી દેવાનું. એ જ રીતે વિહિપના મહામંત્રી પર કેસ નાખી દેવાના પણ એનું કારણ વાંધાજનક એસએમએસનું બતાવવાનું કે જે કોમી શંતિને ખલેલ પહોંચાડે એવા હતા.

પરિવારગત કે અંગત?

હાલ તો વિહિપ મોદી સામે જેટલા જોરશોરથી ધમપછાડા કરે એટલો મોદીને વધુ સ્વીકાર્ય બનવામાં ફાયદો મળી રહ્યો છે. આ સ્ટ્રેટેજી મોદીની પોતાની છે કે પરિવારની છે એ પ્રશ્ન બહુ મહત્વનો છે.

કેટલાક સમય અગાઉ અમે ગણ્યાંગાંઠ્યા પત્રકારો વિહિપના વડા અશોક સિંઘલને અમદાવાદમાં મળ્યા હતા ત્યારે એક પત્રકારે મોદી અને તોગડિયાના સંબંધો વિશે પૂછ્યું હતુ તો અશોક સિંઘલે સૂચક શબ્દોમાં કહ્યું હતું કે તમે પત્રકારો અમારું કશું જાણતા નથી ને સ્પેક્યુલેશનો લગાવ્યા કરો છો. તમે જાણો છો કે તોગડિયા ને મોદી હમણાં મળ્યા હતા? અમારું અંદરખાને જે ચાલતું હોય એ તમે જાણતા નથી. (આ પછી કેટલાક દિવસો બાદ તોગડિયાને મેં પત્રકાર પરિષદમાં પોઈન્ટ બ્લેન્ક તેમના અને મોદીના સંબંધો અને છેલ્લે મોદીને ક્યારે મળ્યા હતા તે વિશે પૂછ્યું હતું તો તોગડિયાએ ઈલુ ઈલુ ચાલી રહ્યું હોવાનું અને દસ જ દિવસ પહેલા મળ્યા હોવાનું કહ્યું હતું.)

સિંઘલજીએ કરેલી વાત ત્યાં હાજર બીજા પત્રકારો બહાર નીકળતા જ ભૂલી ગયા પણ મેં યાદ રાખી છે. તમે પણ યાદ રાખજો.
****

જિંદગીનું સૌથી યાદગાર ‘સાલમુબારક’