સ્ટોરી એવી હતી કે મણિનગર પૂર્વની એક સોસાયટીમાં લગ્નપ્રસંગ હતો. આખી રાત જમણવારની તૈયારીઓ ચાલી હતી ને લગ્નપ્રસંગમાં આવનારા સાતસો માણસોની રસોઈ બની ગઈ હતી. ભાવનગરથી મૂરતિયાની જાન અમદાવાદ પહોંચી ગઈ હતી. જાનના ઉતારાના સ્થળે છોકરીવાળાઓએ ગાંઠિયાને જલેબી પણ વહેંચી દીધા હતા. પછી જાન મણિનગર પૂર્વની સોસાયટીના સ્થળે આવી ને અહીં ફટાકડા ફૂટ્યા, નાચગાન થયું, વરરાજા પણ ઘોડેથી ઉતરીને થોડું નાચ્યા વગેરે. પણ જ્યાં જાન લગ્નસ્થળે પહોંચી ત્યાં જ જેના લગ્ન થનાર હતા તે છોકરી ઘરની પાછળની દિવાલ કૂદીને ભાગી ગઈ. છોકરીવાળાઓને આની ખબર પડી એટલે તેમને તો ધ્રાસકો પડ્યો. થોડી ઘણી તપાસ જોઈ, રાહ જોઈ પણ અંતે છોકરાવાળાઓને કહી દેવું પડ્યું કે આવું થયું છે. થોડી વાર માટે છોકરાવાળાઓના પક્ષે ભારે ઉચાટ થઈ ગયો પણ પછી માલૂમ પડ્યું કે છોકરીવાળા વાલીઓનો કશો વાંક નથી. છોકરીએ અચાનક જ લીધેલું આ પગલું છે.

ખૈર જાન તો ભાવનગરથી આવી હતી ને લગ્ન વગર જ ભાવનગર પાછી ફરી. ને બીજી તરફ સાતસો માણસોની રસોઈ રેલવે ટ્રેક પર ઢોળી દેવી પડી.

હવે આ ઘટનાનો પાર્ટ ટુ વાંચો

પેલી છોકરી બીકોમ થયા બાદ એમસીએનું ભણતી હતી અને એના માટે સુરેન્દ્રનગર એડમીશન લીધું હતું. છોકરી દરબાર જ્ઞાતિની પરંતુ તેને પ્રેમ થયો સાથે જ ભણતા ભાવનગરના દરજી જ્ઞાતિના યુવક સાથે. જ્ઞાતિફેરને કારણે ઘરેથી ના પડશે એવી બીકે છોકરીએ છેક સુધી ઘરે વાત જ કરી ન હતી. લગ્નટાણે છોકરી તો ઘરેથી ભાગી નીકળી ને ભાવનગર પેલા દરજી યુવક પાસે પહોંચી ગઈ. પરંતુ દરજી યુવક આ જાણીને ગભરાયો. તેણે વકીલની સલાહ લીધી તો વકીલે કહ્યું કે આમાં તો છોકરા સામે અપહરણનો કેસ લાગુ પડી શકે છે. છોકરો અતિવ્યવહારૂ પણ માટીપગો નીકળ્યો. છોકરીએ તો છોકરી થઈને લગ્નટાણે ઘરમાંથી ભાગવાનું સાહસ કર્યું પણ છોકરાએ છોકરીને કહ્યું કે આમાં તો મારા પર કેસ થાય તેમ છે. તું આજની રાત વિકાસગૃહમાં રહી લે કાલની વાત કાલે કરીશું…

તો છોકરી ગઈ વિકાસગૃહમાં એટલેકે ટ્રબલ્ડ સ્ત્રીઓના આશ્રયસ્થાનમાં. છોકરી લગ્નના ઘરેથી ભાગી હોવાથી પોતાના ઘરે તો પાછી ફરી શકે તેમ હતું જ નહીં તેથી.

હવે અહીં ટ્રબલ્ડ સ્ત્રીઓએ છોકરીને સમજાવી કે મા-બાપના ચરણોમાં અને તેઓ કહે તથા કરે એમાં જ સાચું સુખ છે. છોકરીને લાગ્યું કે જે પ્રેમી માટે સાહસ કર્યું એ પ્રેમીની લગ્ન કરવા માટે જીગર ચાલતી નથી અને પોતે ન ઘરની કે ન ઘાટની રહી છે. છોકરીએ તેના પ્રેમીને સંભળાવી દીધું કે બાર કલાક ઘરમાં ન રાખી શક્યો તો આખી જિંદગી શું રાખી શકીશ તું? છોકરીએ મા-બાપનો સંપર્ક સાઘતા તેઓ ભાવનગર આવી પહોંચ્યા. બીજી તરફ છોકરીનો કિસ્સો અમદાવાદ પૂર્વમાં ચર્ચાએ ચડ્યો હોવાથી તેણીને વડોદરા કોઈ સગાને ત્યાં શીફ્ટ કરી દેવાઈ છે.

પાર્ટ ટુ પૂરો થાય છે.

આ સ્ટોરી છપાઈ એ પહેલા અખબારી ભવનમાં પ્રૂફ રીડરથી માંડીને કમ્પોઝર જે પણ તેમની ફરજના ભાગરૂપે આ સ્ટોરી વાંચે એ કહેવા આવતા હતા કે આ સ્ટોરી છપાશે એટલે હોટકેક થઈ જશે. કોઈના જીવનના સહન ના થાય એવા આટાપાટા અમારા માટે સમાચાર બને છે અને આવા સમાચારો હોટકેક બને છે એ મારા પ્રોફેશનની વિટંબણા છે. પણ મોઢા પર દુપટ્ટા ઓઢીને ટુ-વ્હીલર પર બોયફ્રેન્ડ સાથે રખડતી છોકરીઓના જમાનામાં આવા કિસ્સાને સમાજ સામે લાલબત્તી ધરવા છાપામાં પ્રસ્તુત કરવાની અમારી ફરજ પણ બને છે.

થોડા સમય પહેલા અમદાવાદના શીલજમાં એક્સીડન્ટ થયો હતો જેમાં ત્રણ ગ્રામીણોના મોત થયા હતા. આ કાર એક પૈસાદાર ઠક્કર નબીરો ચલાવતો હતો અને તેની સાથે તેની ગર્લફ્રેન્ડ, મિત્ર અને મિત્રની ગર્લફ્રેન્ડ હતા. આ બધા યુવક યુવતીઓને હું કેસના ઈન્વેસ્ટીગેશન પછી સરખેજ પોલીસ સ્ટેશનમાં મળ્યો હતો. પોલીસે છોકરીઓને પત્રકારો સમક્ષ વાત કરવા પ્રસ્તુત કરી ત્યારે છોકરીઓએ મા-બાપ, પોલીસ અને પત્રકારોની હાજરીમાં કહ્યું કે તેઓ તો લોંગરાઈડ પર ગઈ હતી. એનીમીયાથી પીડાતી, પાતળી, ઠીંગણી, મધ્યમવર્ગની, નોકરિયાત પિતાની આ પુત્રીઓ ઘરેથી છુપાવીને લોંગરાઈડ પર ગઈ હતી અને તેમાં આટલો ગંભીર અકસ્માત થયો એ વાત પણ ત્રણ દિવસ સુધી મા-બાપથી છુપાવી હતી ને મ્યુઝીક સાંભળતી હતીને એક્ટીવાનું પુશ બટન દબાવીને ફરવા નીકળતી હતી. પોલીસનો કોલ આવ્યો ત્યારે જ તેમનો ભાંડાફોડ થયો હતો.

એક સમયે મેં ઓઢવ નારીસંરક્ષણ ગૃહની પત્રકારની હૈસિયતથી મુલાકાત લીધી હતી ત્યારે ત્યાં ગુજરાતના જાણીતા અખબારી કાર્ટૂનીસ્ટની છોકરીનો ઈન્ટર્વ્યૂ લીધો હતો. આ છોકરી લાલદરવાજા વિસ્તારની કોલેજમાં ભણતી હતી અને બસમાં આવતા જતા એક મુસ્લિમ છોકરાએ બહુજ બધુ ખોટુ બોલીને તેને પટાવી લીધી હતી. છોકરીએ મુસ્લિમ છોકરા સાથે લગ્ન કર્યા પછી છોકરાએ આગ્રહ રાખ્યો કે બુરખો તો પહેરવાનો જ અને માસ તો બનાવવું જ પડશે. ધીમે ધીમે સંબંધો એવા વણસ્યા કે છોકરીએ કોર્ટના હુકમથી નારી સંરક્ષણ ગૃહમાં દાખલ થવું પડ્યું. છોકરીએ મુસ્લિમ છોકરા સાથેના ઈશ્ક અને શાદીની વાત તેના મા-બાપથી છુપાવી રાખી હતી એ કહેવાની જરૂર ખરી?

મારા પત્રકારત્વની સૌથી યાદગાર સ્ટોરીઓ પૈકીની એક સ્ટોરી એ હતી કે અમદાવાદની એચકે કોલેજમાં એક છોકરી અને છોકરાને પ્રેમ થઈ ગયો. છોકરી અઢાર વર્ષ ઉપરની હતી પણ છોકરો એકવીસ વર્ષનો નહતો થયો તેથી કાયદેસર લગ્ન ન કરી શકે. છોકરી તેની વિધવા માની એકની એક દીકરી હતી અને વિધવા મા છોકરીને અન્યત્ર પરણાવવાની તજવીજમાં હતી ત્યારે જ છોકરી ભાગી નીકળી. પણ છોકરીનો દુલ્હો તો પુખ્ત ન હતો એટલે કામકાજ ગેરકાયદે ઠરે અને પોલીસ કેસ પણ થાય. આના ઉપાય તરીકે છોકરીએ પેલા છોકરાના સગા મોટા ભાઈ સાથે કોર્ટ મેરેજ કરી લીધા કે જેથી તેના નાના ભાઈ સાથે ઘરમાં રહી શકાય. નાનો ભાઈ પુખ્ત થતા જ છોકરી અને મોટોભાઈ છૂટાછેડા લઈ લે એવું નક્કી થયું હતું. મારા માટે છોકરી, મોટો ભાઈ અને નાના ભાઈના ઈન્ટરવ્યૂ કરવાનું ભારે અટપટું હતું. આ સ્ટોરી પહેલે પાને છપાઈ હતી અને પછી તો જમાલપુરની ચાલીમાં કે જ્યાં છોકરી પરણીને આવી હતી ત્યાં ટીવી ચેનલોની ઓબી વાનોના ધાડા ઉમટી પડ્યા હતા. આમાં મૂળ વાત એ છે કે છોકરીની અસારવામાં રહેતી વિધવા માતાને આખું ઓપરેશન પત્યું ત્યાં સુધી છોકરીની પ્રેમકથા વિશે કશું માલૂમ પડ્યું ન હતું.

અને પાછલા વર્ષે જ મેં પાટણની પીટીસી કોલેજની વિદ્યાર્થીની કે જેના પર કોલેજના માસ્તરોએ મહિનાઓ સુધી વારાફરથી હાથ અજમાવ્યો હતો તેના પિતાની મુલાકાત લીધી હતી. અમદાવાદની સિવિલ હોસ્પિટલમાં છોકરી દાખલ હતી ને પિતા દારૂ પીને આવ્યા હતા. પિતાનું કહેવું હતું કે દીકરીએ ઘરે કશી વાત કરી જ નહીં. ઉલ્લેખનીય છે કે આ છોકરીએ અદ્યાપકો સાથેની પોતાના સેક્સ સંબંધોની વાત કોઈને કરી ન હતી. એક દિવસ પ્રેગ્નેન્ટ બનીને તેને ચક્કર આવ્યા ને કોલેજની પ્રાર્થનામાં ઢળી પડી ત્યારે જ મામલો પ્રકાશમાં આવ્યો હતો.

આજકાલ મોટાભાગના લેથાર્જીક લીબરલ્સ મા-બાપોને માલૂમ નથી હોતું કે તેમની જનચંપા ક્યાં ફરે છે ને શું કરે છે.પછી એમને સરપ્રાઈઝ મળે છે અને અમને ન્યૂઝ.

******

સોનાની પથારી પર કોણ સૂવા પામ્યું?