ગુજરાતમાં ગુજકોકનો કાયદો લાગુ થાય એ માટે મુખ્યમંત્રી નરેન્દ્ર મોદી એડી ચોટીનું જોર લગાવી રહ્યા છે. મંત્રીમંડળ દ્વારા ઠરાવ પસાર કરાયો. અડવાણી સહિતના ભાજપના સાંસદોને રજૂઆત કરવા વડાપ્રધાન પાસે મોકલ્યા અને બીજું ઘણું કર્યું પરંતુ કેન્દ્ર સરકાર ગુજકોકના કાયદાને મંજૂરી આપતી નથી. જ્યાં સુધી બિનભાજપી સરકારનું દિલ્હીમાં રાજ હશે ત્યાં સુધી ગુજરાતને ગુજકોક નથી મળવાનો એ લખીને રાખો.

ખૈર પણ અહીં મારે વાત કરવી છે ગુજકોક માટે ભાજપે યોજેલા ધરણાની. નહેરૂબ્રીજની સામે સાકાર તરફ જતો રસ્તો રોકીને મોટો શામિયાણો બાંધીને ભાજપે ગુજકોકના કાયદાને મંજૂરી આપવાની માંગણી કરવાના હેતુથી ધરણા યોજ્યા. ધરણામાં વચ્ચે વચ ગુજરાત ભાજપના અધ્યક્ષ પુરૂષોત્તમ રૂપાલા બેઠા હતા. અને ટીવી પત્રકારો ધરણાના સ્થળે પહોંચ્યા ત્યારે તેમની આજુબાજુ ભાજપનું એક્સ-ફેક્ટર બેઠું હતું. ભાજપનું આ એક્સ-ફેક્ટર જબરૂં છે ભાઈ. એમાં એક્સ એટેલેકે ભૂતપૂર્વો છે. બધી નવરા બ્રિગેડ છે. જેમ કે ધરણામાં એક હતા ભુપેન્દ્રસિંહ ચુડાસમા જેઓ ધોળકામાં ચૂંટણી એવી બુરી રીતે હારી ગયા છે કે ફરી ત્યાંથી જીતવાના ચાન્સ નથી. બીજા મહાનુભાવ જે ધરણામાં બેઠેલા હતા એ હતા આઈકે જાડેજા કે જેઓ ધ્રાંગધ્રામાંથી ચૂંટણી હારી ગયા છે. ત્રીજા બેઠેલા હતા એ હતા જુનાગઢના પૂર્વ સાંસદ ભાવનાબહેન ચીખલીયા કે જેઓ જુનાગઢમાં પાછલું ઈલેક્શન હારી ગયા હતા. અન્ય એક મહાનુભાવ જે ધરણામાં બેઠા હતા એ હતા જયંતિભાઈ બારોટ કે જેમની રાજ્યસભાની ટર્મ હમણાં પૂરી થઈ પછી પક્ષે રીન્યુ કરી નહીં તેથી તેઓ પણ ભૂતપૂર્વ બની ગયા. બીજા એક બેઠેલા હતા એ હતા અમિત શાહ કે જે અમદાવાદના ભૂતપૂર્વ મેયર છે. તેઓ મેયર પદે હતા ત્યારે એલિસબ્રીજના ધારાસભ્ય બનવાની તેમની ગણતરી હતી પણ ટર્મ પૂરી થઈ એટલે મેયર પદ તો જવાનુ હતુ ને ગયું ને અધૂરામાં પૂરું મોદીએ એલિસબ્રીજ વિધાનસભાની ટિકીટ પણ ના આપી એનું દુ:ખ. આમ આ પણ ભૂતપૂર્વ એટલેકે એક્સ. આ બધા મહાનુભાવો ભૂતપૂર્વ બની ગયા પછી પક્ષના કાર્યક્રમોમાં ખાસ્સા ઈન્વોલ્વ દેખાય છે. બાકી ભૂપેન્દ્રસિંહ મંત્રી હતા ત્યારે તેમનો રોફ જોવા જેવો હતો. આવા કાર્યક્રમોમાં તો સમય જ ન બગાડે. સમય સમય બલવાન છે. અને ગુજરાત ભાજપના ધરણા હોય ત્યારે એક્સ ફેક્ટર બલવાન છે.

રાજકારણમાં ભૂતપૂર્વોની આર્થિક નહીં પણ માનસિક દશા બિચારી હોય છે. ચૂંટણીએ ચૂંટણીએ તેઓ કુંવારા છે. રાજ્યસભાની ચૂંટણી આવે તો વરમાળા પહેરવા તૈયાર પણ કોઈ પહેરાવે નહીં તો પાછા ઘરે..પછી બોર્ડ નિગમના ઓરતા… પછી લોકસભાની ચૂંટણી આવે છે એટલે મોઢું લાળ લાળ થાય. એય નહીં તો પાછું આગલી વિધાનસભાનું આયોજન. આ બધી પ્રોસેસ ચાલતી હોય ત્યારે તમાચો મારીને ગાલ પર લાલી બતાવવાની કે ‘ભઈ અમે તો સંગઠનમાં એક્ટીવ છીએ…રાજ્ય માટે કામ કર્યું હવે પક્ષ માટે કામ કરીશું…’ વાહ વાહ વાહ વાહ…

તો બોલો શહીદો… એટલે ગાદી પર પલાઠી વાળીને શિસ્તબદ્ધ બેઠેલું આખું એક્સ ફેક્ટર સફેદ બાંયના ઝભ્ભાવાળા હાથ ઉંચા કરીને બોલશે…અમર રહો!! બોલો શહીદો એટલે કહેશે…અમર રહો!!

****

સફદર નાગોરી ઢીલો ઢફ્ફ દેખાતો હતો