વિશ્વ હિંદુ પરિષદની છાપ મિડિયાએ પાછલા કેટલા વર્ષોમાં સફળ રીતે જુદી તરેહની ઉભી કરી દીધી છે. વિહિપને લોકો માત્ર આંદોલનકારી સંગઠન તરીકે જ ઓળખે એનું મિડિયાએ હંમેશા ધ્યાન રાખ્યું છે.

કોઈ પણ સફળ સંગઠનના હકીકતમાં બે પાસા હોય છે જેમાંનું એક આંદોલનકારી પાસુ હોય છે જ્યારે બીજું રચનાત્મક પ્રવૃત્તિઓનું પાસુ હોય છે. હિંદુ હિતમાં વિહિપના રચનાત્મક કાર્યક્રમો બારેય મહિના ચાલતા હોય છે. હમણાં વિહિપના ગુજરાત પ્રદેશ મહામંત્રી શ્રી કૌશિકભાઈ મહેતાને મળવાનું થયું તો માલૂમ પડ્યું કે ખ્રિસ્તિ મિશનરીઓ જે રીતે ગુજરાતના પ્રત્યેક આદિવાસીને વટલાવવા માટે ગુજરાતની પૂર્વ પટ્ટીમાં કાર્યરત બની છે તેનાથી આપણા ભોળા વનવાસી ભાઈઓને બચાવવા અને હિંદુત્વ જાળવી રાખવા વિહિપ રચનાત્મક ઢબે કઈ રીતે હિંદુ ધર્મનું રક્ષણ કરવાના પ્રયત્નો કરી રહી છે.

નડિયાદના સંતરામ મંદિરમાં વિહિપના ઉપક્રમે હાલમાં ‘રામ સાધક કથાકાર વર્ગ’ ચાલી રહ્યો છે. આ એક એવો પ્રોજેક્ટ છે કે જે વનવાસીઓમાં(આરએસએસ આદિવાસી નહીં પરંતુ વનવાસી શબ્દ પસંદ કરે છે)રામ નામના પ્રચાર મારફતે હિંદુ ધર્મને જાળવી રાખવાનું કામ કરે છે. આ પ્રોજેક્ટના ઈન્ચાર્જ શ્રી મુક્તાનંદ મિશ્રાએ આ વિશે માહિતી આપતા કહ્યું કે રામ સાધક કથાકાર વર્ગમાં આ વખતે હાલ ૪૪ જેટલા વનવાસીભાઈઓ રામકથા કરવાની તાલીમ લઈ રહ્યા છે. આ અંતર્ગત એક મહિનો નડિયાદના સંતરામ મંદિરમાં રોકાઈને તાલીમ લેવાની હોય છે. આ પછી છ મહિના સુધી આ વનવાસીઓએ પોતાના વિસ્તારમાં પહોંચીને રામકથા કરવાની રહેશે. તે પછી તેઓ પાછા પરત નડિયાદ સંતરામ મંદિરમાં આવશે જ્યાં તેમના અનુભવોને આધારે વધુ આભ્યાસ કરશે. આખરમાં વનવાસીભાઈઓને એક મહિનો અયોધ્યા મોકલવામાં આવે છે કે જ્યાં રામકથા પ્રવિણ કેન્દ્રમાં સંપૂર્ણ તાલીમ પૂરી કરવાની હોય છે. આ પછી વનવાસી ભાઈને રામકથાના સંપૂર્ણ જાણકાર હોવાનું પ્રમાણપત્ર આપવામાં આવશે.

ગુજરાતમાં આ પ્રકલ્પ(પ્રોજેક્ટ) દોઢ વર્ષથી ચાલે છે. આ વખતે અત્યાર સુધીની સૌથી વધુ ૪૪ વનવાસીઓની સંખ્યા નોંધાઈ છે. શ્રી મુક્તાનંદજીનું કહેવું છે કે આ પ્રકલ્પ બાદ કથાકાર પોતે નિર્વ્યસની તો અવશ્ય બને છે. સાથે સાથે તેની આસપાસના વર્તુળમાં રામનામનો પ્રચાર કરતો થાય છે. જો કે અહીં પ્રચાર શબ્દ અયોગ્ય છે કારણકે રામ અને વનવાસીઓ વચ્ચેનો સંબંધ સદીઓથી મૌખિક રામાયણ મારફતે ચાલતો આવ્યો છે. ગુજરાતના વનવાસીઓની બહુમતિ વસ્તીવાળા ડાંગ જિલ્લાનું નામ દંડકારણ્ય પરથી પડેલું છે. અહીં શબરીના નામ પરથી સુબીર નામનું ગામ પણ આવેલું છે. હનુમાનની અહીં પરાપૂર્વથી પૂજા થતી આવી છે. રામકથાકાર વર્ગ દ્વારા ગુજરાતના વનવાસીઓ પોતાની જ રામાયણ સંસ્કૃતિમાં રહીને આદ્યાત્મિક ઉન્નતિ કરી રહ્યા છે.