નવી દિલ્હીઃ  ભ્રષ્ટાચારના કેસમાં સીબીઆઈ દ્વારા દિલ્હીના નાયબ મુખ્યપ્રધાન મનીષ સિસોદિયાને પૂછપરછ માટે બોલાવવામાં આવ્યા તે પહેલાં તેમણે તથા તેમના પક્ષના કાર્યકરો જે વર્તન કરી રહ્યા છે આશ્ચર્યજનક છે.

મનીષ સિસોદિયા પોતે તેમજ આમ આદમી પાર્ટીના કાર્યકરો એ રીતે વર્તન કરી રહ્યા છે જાણે સિસોદિયાએ દેશના સન્માનમાં કોઈ બહુ મોટું કામ કર્યું હોય.

આ અંગે ભાજપના નેતા અમિત માલવિયએ ટ્વિટ કરીને લખ્યું કે, મનીષ સિસોદિયા અને સંજય રાઉત વચ્ચે ઘણું સામ્ય દેખાય છે. બંને કેમેરાની સામે ઊભા રહ્યા, પત્ની અને માતાના હાથે તિલક અને આરતી કરાવી. બંને ખુલ્લી કારમાં ઘરની બહાર નીકળ્યા. આટલું લખીને માલવિયએ આશંકા વ્યક્ત કરી છે કે, પરિણામ પણ કદાચ એક સમાન હશે. રાઉત જેલમાં છે અને કદાચ કાયમ માટે રહેશે.

શિવસેનાના નેતા સંજય રાઉત એક હાઉસિંગ સોસાયટીના કૌભાંડ કેસમાં આરોપી છે અને ઈડી દ્વારા તેમની ધરપકડ કરવામાં આવી હતી. તે સમયે તેમણે પણ આ રીતે જ જાહેર પ્રદર્શન કર્યું હતું.

એ જ રીતે આમ આદમી પાર્ટીના નેતા દિલ્હીમાં શરાબની એક્સાઇઝ નીતિમાં ફેરફાર કરીને અમુક લોકોને ખોટી રીતે લાભ અપાવવના આરોપનો સામનો કરી રહ્યા છે. આક્ષેપ એવો પણ છે કે સિસોદિયાને પોતાને તેમજ તેમની આમ આદમી પાર્ટીને એ નીતિથી નાણાકીય લાભ થયો છે.

સીબીઆઈ તેમજ ઈડી આ કેસમાં બેથી ત્રણ આરોપીઓની ધરપકડ કરી ચૂકેલી છે અને આજે એ સંદર્ભમાં જ આજે સિસોદિયાને સીબીઆઈએ પૂછપરછ માટે બોલાવ્યા છે. પૂછપરછ માટે સીબીઆઈ ઑફિસ જતા પહેલાં તે ગાંધીજીના સમાધિ સ્થળ રાજઘાટ પણ ગયા હતા.

દેશ ગુજરાત