નવી દિલ્હીઃ  ભારતે ચાલુ નાણાકીય વર્ષના પ્રથમ છ મહિનામાં રૂપિયા 8000 કરોડના શસ્ત્ર-સરંજામની નિકાસ કરી છે અને વર્ષ 2025 સુધીમાં વાર્ષિક રૂપિયા 35,000 કરોડના સૈન્ય સરંજામની નિકાસ કરવાનો લક્ષ્યાંક છે.

સંરક્ષણ સચિવ અજય કુમારને ટાંકીને આ અંગે પ્રકાશિત (https://www.moneycontrol.com/news/business/defence-exports-touch-rs-8000-crore-in-h1-as-sector-gains-from-make-in-india-9437631.html ) એક અહેવાલ મુજબ દેશનું લક્ષ્યાંક છે કે આ અમૃતકાળમાં અર્થાત 100મો સ્વતંત્રતા દિવસ આવે ત્યાં સુધીના 25 વર્ષમાં ભારત સંરક્ષણ ઉત્પાદનની બાબતમાં વિશ્વમાં પાંચમા નંબરનું સ્થાન હાંસલ કરશે.

સંરક્ષણ ક્ષેત્રે આવું આમુલ પરિવર્તન આવવાનું કારણ એ છે કે, ભારત સરકારે મહત્ત્વાકાંક્ષી મેઇક-ઈન-ઈન્ડિયા યોજના શરૂ કરી છે જેને પરિણામે દેશ આ ક્ષેત્રમાં નિકાસ કરવાની સ્થિતિમાં પહોંચી શક્યો છે. વ્યક્તિગત સુરક્ષા ચીજો, ઑફશૉર પેટ્રોલ વેસલ, એએલએચ હેલિકોપ્ટર, એસયુ એવિઓનિક્સ, કોસ્ટલ સર્વેલન્સ સિસ્ટમ, કવચ એમઓડી-2 લૉન્ચર તથા એફસીએસ, રડારનાં સાધનો, ઈલેક્ટ્રોનિક સિસ્ટમ તેમજ લાઇટ એન્જિનિયરિંગ મિકેનિકલ પાર્ટ જેવી અનેકવિધ ચીજોની નિકાસ શક્ય બની છે.

સંરક્ષણ મંત્રાલય સૈન્ય સરંજામની નિકાસ વધારવા માટે અન્ય ચીજોના કોન્ટ્રેક્ટ કરવાની દિશામાં પણ કામ કરી રહ્યું છે. તેમાં શ્રીલંકાને બે ડોર્નિયર મિલિટરી એરક્રાફ્ટ તથા લાઇટ કોમ્બેટ એરક્રાફ્ટ – તેજસનો સમાવેશ થાય છે. આ બંને યુદ્ધવિમાનનું નિર્માણ સરકારી માલિકીની હિન્દુસ્તાન એરોનોટિક્સ લિમિટેડ (એચએએલ) દ્વારા કરવામાં આવ્યું છે.

આ વર્ષે જાન્યુઆરીમાં આપણે બનાવેલી બ્રહ્મોસ સુપરસોનિક એન્ટી-શિપ મિસાઇલના વેચાણ માટે ભારત અને ફિલિપિન્સ વચ્ચે 375 મિલિયન ડૉલરનો કરાર થયો હતો.

સંરક્ષણ મંત્રાલય હેઠળ 16 કંપનીઓ ઉપરાંત 50 કરતાં વધુ ખાનગી કંપનીઓ હાલ દેશમાં સંરક્ષણ શસ્ત્ર-સરંજામનું નિર્માણ કરી રહી છે અને દેશ હાલ ઈટાલી, ફ્રાન્સ અને ચીલી સહિત 75 દેશોમાં વિવિધ સૈન્ય સરંજામની નિકાસ કરે છે.

દેશ ગુજરાત