મહારાષ્ટ્રમાં ગુજરાતી સમાજના કાર્યક્રમમાં શિંદે જય ગુજરાત બોલ્યા એમાં વિપક્ષને વાંધો પડયો

July 04, 2025
Gujarati

મનસે કાર્યકરો દ્વારા દુકાનદાર પર થયેલા હુમલા અંગે ચાલી રહેલા વિવાદ વચ્ચે, મહારાષ્ટ્રના નાયબ મુખ્ય પ્રધાન એકનાથ શિંદેએ શુક્રવારે “જય ગુજરાત” ના નારા લગાવ્યા બાદ પોતાનું ભાષણ “જય ગુજરાત” સાથે સમાપ્ત કર્યું. તેઓ જયરાજ સ્પોર્ટસ એન્ડ કન્વેન્શન સેન્ટરના કેન્દ્રિય ગૃહ મંત્રી અમિત શાહ દ્વારા કરવામાં આવેલા ઉદઘાટનના સમારંભમાં બોલી રહ્યા હતા. સમારોહનું આયોજન શ્રી પૂના ગુજરાતી બંધુ સમાજ દ્વારા કરવામાં આવ્યું હતું તેથી સ્વાભાવિક રીતે જ શિંદે જય મહારાષ્ટ્રની સાથે જય ગુજરાત પણ બોલ્યા હતા. જો કે ગુજરાત અને ગુજરાતીઓ વિરુદ્ધ અદેખાઇ અને દ્વેષભર્યું વલણ દાખવતા મહારાષ્ટ્રના વિપક્ષોને આ ગમ્યું ન હતું.

પુણેમાં એક કાર્યક્રમમાં બોલતા શિંદેએ ગૃહ પ્રધાન અમિત શાહની પ્રશંસા કરી અને તેમના ભાષણનો અંત આ નારાઓ સાથે કર્યો: “જય હિંદ, જય મહારાષ્ટ્ર, જય ગુજરાત.”

શિંદેની આ ટિપ્પણીનો ગુજરાત અને ગુજરાતીઓ વિરોધી વલણ ધરાવતા વિરોધ પક્ષ તરફથી ટીકા થઈ હતી, જેમાં NCP (SP) ના નેતા ક્લાઈડ ક્રાસ્ટોએ નાયબ મુખ્ય પ્રધાન પર નિશાન સાધ્યું હતું, જેમણે અમિત શાહ અને પીએમ નરેન્દ્ર મોદી ગુજરાતના હોવાથી શિંદેને “સત્તા માટે લોભી” ગણાવ્યા હતા.

પરંતુ મહારાષ્ટ્રના મુખ્યમંત્રી દેવેન્દ્ર ફડણવીસે શિંદેનો બચાવ કર્યો હતો. “શિંદેએ ‘જય ગુજરાત’ કહ્યું હોવાનો અર્થ એ નથી કે શિંદે મહારાષ્ટ્ર કરતાં ગુજરાતને વધુ પ્રેમ કરે છે. આવી સંકુચિત વિચારસરણી મરાઠી લોકોને શોભતી નથી,” ફડણવીસે પત્રકારોને જણાવ્યું હતું.

રાજ ઠાકરેની મહારાષ્ટ્ર નવનિર્માણ સેના (MNS) ના કાર્યકરો મુંબઈમાં દુકાનદારોને મરાઠીમાં બોલવાનો ઇનકાર કરવા બદલ માર મારતા દર્શાવતા વીડિયો વાયરલ થયા બાદ પણ આ નારા લગાવવામાં આવ્યા છે.

ફડણવીસે આ અંગેના પ્રશ્નોના જવાબ આપતા કહ્યું કે મરાઠીનું સન્માન કરવું જોઈએ, પરંતુ કોઈને પણ માર મારવો સહન કરવામાં આવશે નહીં. મુખ્યમંત્રીએ એક પત્રકાર પરિષદ દરમિયાન એમ પણ કહ્યું કે મરાઠીના નામે “ગુંડાગીરી” સહન કરવામાં આવશે નહીં.

મહારાષ્ટ્રના પરિવહન મંત્રી પ્રતાપ સરનાઈક, જે શિંદેની શિવસેનાના નેતા પણ છે, તેમણે મનસે પર કટાક્ષ કર્યો. “શું એકલા મનસેને જ મરાઠી ભાષા માટે લડવાનો અધિકાર છે? જો કોઈ કાયદો હાથમાં લઈ રહ્યું છે અને રાજકીય કે નાણાકીય લાભ માટે મજૂર વર્ગના વ્યક્તિઓને નિશાન બનાવી રહ્યું છે, તો તે સહન કરવામાં આવશે નહીં,” સરનાઈકે કહ્યું.

તાજેતર ના લેખો