કેજરીવાલના મોબાઇલ રિચાર્જ વિશે માનવામાં ન આવે એવી વાત કહી ભગવંત માન મજાકનો વિષય બન્યા

October 03, 2022
કેજરીવાલના મોબાઇલ રિચાર્જ વિશે માનવામાં ન આવે એવી વાત કહી ભગવંત માન મજાકનો વિષય બન્યા

નવી દિલ્હીઃ  અરવિંદ કેજરીવાલ જી ઇતને ગરીબ હૈ કિ ઉનકે પાસ મોબાઇલ રિચાર્જ કે પૈસે ભી નહીં હૈ- તેમ પંજાબના આમ આદમી પાર્ટીના મુખ્યપ્રધાન ભગવંત માને કહ્યું હતું. તેમના આવા નિવેદનને પગલે નેટિઝન્સે વાસ્તવિક સ્થિતિ ઉજાગર કરવા ઉપરાંત કેટલાક લોકોએ મજાક ઉડાવવાનું પણ શરૂ કર્યું હતું.

ભગવંત માનનો એક વીડિયો વાયરલ થયો છે જેમાં તેમને એમ કહેતા સાંભળી શકાય છે કે, પોતે એક વખત કેજરીવાલ સાથે વાત કરવા માગતા હતા અને ફોન કરે તો કટ થઈ જતો હતો. પછી બીજા ફોનથી વાત થઈ ત્યારે તેમણે મને કહ્યું કે, મારા ફોનમાં બેલેન્સન જ નથી એટલે હું તમને સામે ફોન કરી શકતો નથી.

માનનો આ વીડિયો વાયરલ થયા પછી કંચન ગુપ્તા જેવા પીઢ પત્રકારો સહિત અનેક લોકોએ વાસ્તવિકતા ઉજાગર કરી. કંચન ગુપ્તાએ ટ્વિટ કરીને ભગવંત નામનું નામ લખ્યા વિના જણાવ્યું કે, કૉમિકથી એબ્સર્ડ થઈ રહ્યા છે. તેમણે આગળ લખ્યું કે, અરવિંદ કેજરીવાલના ફોનનું બિલ દિલ્હીની રાજ્ય સરકાર ચૂકવે છે, અને તેથી રિચાર્જનો પ્રશ્ન ઉઠતો નથી. જો તેમણે ભગવંત માનને કહ્યું હોય કે પોતાના ફોનમાં રિચાર્જ નથી, તો એનો અર્થ એ છે કે કેજરીવાલ માન સાથે વાત કરવા માગતા નથી. સાથે તેમણે એવી નોંધ પણ મૂકી છે કે ભગવંત માનના મોબાઇલનું બિલ પણ રાજ્ય સરકાર દ્વારા ચૂકવવામાં આવે છે.

પંજાબમાં ભાજપના નેતા મનિન્દરસિંહ સિરસાએ લખ્યું કે, બદલાવ કે નામ પે બરબાદી. પંજાબના મુખ્યપ્રધાન ગુજરાતમાં સ્ટેન્ડઅપ કૉમેડિયનની ભૂમિકા ભજવી રહ્યા છે જ્યારે પંજાબ સહન કરી રહ્યું છે. એક રાજ્યના મુખ્યપ્રધાન તરફથી આવું વક્તવ્ય સાંભળવું પડે એ કેટલું શરમજનક છે!

તો વિજય પટેલ નામના યુઝરે લખ્યું કે, દરેક કંપની માસિક પેક સાથે ફ્રી કૉલની સુવિધા આપે છે, પરંતુ આપ-ના નેતાઓ માને છે કે લોકો મુર્ખ છે અને તેથી તેઓ ગમે તેવી ફેક વાતો ફેલાવી શકે છે. એ સાથે તેમણે તથા અન્ય યુઝરોએ પણ કેજરીવાલનો એક લાખથી વધુની કિંમતના આઈફોન સાથેનો ફોટો પણ શૅર કર્યો છે.

દેશ ગુજરાત

Recent Stories