દિલ્હીમાં દૂરદર્શન સમાચારના પત્રકાર અને કેમેરામેન ઉપર કેજરીવાલના સમર્થકોનો હુમલો

નવી દિલ્હીઃ  દિલ્હીમાં સરકારી શાળાઓની સ્થિતિ અંગે છેલ્લા થોડા સમયથી ચાલી રહેલો વિવાદ આજે ચરમસીમાએ પહોંચ્યો હતો. આ શાળાઓની વાસ્તવિક સ્થિતિ અંગે રિપોર્ટિંગ કરવા ગયેલી દૂરદર્શન સમાચારની ટીમ ઉપર શિક્ષકો સહિત આમ આદમીના સમર્થકોએ હુમલો કર્યો હતો એટલું જ નહીં પરંતુ કેમેરા તોડી નાખ્યો હતો અને તેમાંથી ચીપ કાઢીને પણ તેને ટુકડા કરી દીધા હતા જેથી કોઇપણ પુરાવો બચે નહીં.

થોડા સમય પહેલાં જ દેશ ગુજરાતમાં પણ સમાચાર પ્રકાશિત થયા હતા કે દિલ્હીમાં સરકારી શાળાના વિદ્યાર્થીઓએ કન્ટેનરમાંથી બનાવેલા કામચલાઉ વર્ગોમાં બેસીને ભણવું પડે છે (https://deshgujarat.com/2022/09/12/delhi-govt-schools-students-have-to-study-in-temporary-container-made-classrooms/ ) તે સમયે કેટલાક અગ્રણી મીડિયાએ આ સમાચાર પ્રકાશિત કર્યા હતા. અને આજે દૂરદર્શન સમાચારની ટીમે તેને કેમેરામાં કંડારવાનો પ્રયાસ કર્યો ત્યારે તેમના પર હિંસક હુમલો થયો હતો.

આશ્ચર્યની વાત એ છે કે કેજરીવાલ દિલ્હીના શિક્ષણ મોડલની વાતો કરતા રહે છે અને બીજા રાજ્યોને તેના વિશે સલાહ આપતા રહે છે એટલું જ નહીં પરંતુ જ્યાં ચૂંટણી હોય ત્યાંના શિક્ષણ મોડેલની ટીકા કરીને દિલ્હી જેવું મોડલ બનાવવાના બણગાં ફૂંકતા રહે છે, પરંતુ એ મોડલ ખરેખર શું છે એ કોઇને આજ સુધી બતાવ્યું નથી.

દૂરદર્શનની સમાચાર ટીમે આ અંગે પ્રશ્ન પણ ઉઠાવ્યો કે, એક તરફ ન્યૂયોર્ક ટાઇમ્સ દિલ્હીના શિક્ષણ મોડેલ વિશે લેખ પ્રકાશિત કરે છે, પરંતુ કોઈ તેની વાસ્તવિકતા જોવા જાય ત્યારે હુમલો કરવામાં આવે છે.

દેશ ગુજરાત