ગુજરાત એ ભારતનું કેમીકલ જાયન્ટ સ્ટેટ છે. આંકડા જ જોઈ લો ને ? ભારતનુ અર્ધાથી વધુ કેમીકલ ઉત્પાદન ગુજરાતમાં થાય છે. અને ગુજરાતે આ પ્રગતિ જારી રાખી છે. પાછલા વર્ષના ડિસેમ્બર સુધીના કેમીકલ ક્ષેત્રે ભારતમાં થયેલા કુલ મૂડીરોકાણ પૈકીનુ ૨૭ ટકા રોકાણ માત્ર ગુજરાતમાં થયુ છે. ભારતમાં કેમીકલ ક્ષેત્રે મૂડીરોકાણ માટે જાહેર થયેલા કુલ ૮૧૨ પ્રોજેક્ટો પૈકીના ૧૭૮ ગુજરાતમાં જાહેર થયા છે. કેમીકલ ક્ષેત્રની આ ગણતરીમાં દવાઓ, ફાર્માસ્યુટીકલ્સ, પેટ્રોલીયમ પેદાશો, ખાતર, ડાઈઝ, ઓર્ગેનીક અને ઈનઓર્ગેનીક પેદાશોનો સમાવેશ થાય છે. રો મટીરીયલ પ્રાપ્ત હોવુ એ કેમીકલ ઈન્ડસ્ટ્રીમાં રોકાણ માટેની સૌથી મહત્વની પૂર્વ શરત હોય છે. ગુજરાતમાં મીઠુ, એસીટીક એસિડ, ફીનોલ, મેથેનોલ, ફોર્મલ્ડીહાઈડ, કોસ્ટીક સોડા, સોડા એશ ઘર આંગણે ઉપલબ્ધ છે જે ડાઈઝ, પેન્ટ, પીગમેન્ટ, દવાઓ અને જંતુનાશક દ્રવ્યો બનાવવા માટેના કાચા માલ છે. વળી કેમીકલ ઈન્ડસ્ટ્રીમાં નિકાસનું પણ પોતાનું મહત્વ છે. ગુજરાત દરિયાકિનારો ધરાવતુ અને સારા બંદર ધરાવતુ રાજ્ય હોવાના કારણે પણ ઈન્ડસ્ટ્રીઓને મૂડીરોકાણ કરવા માટે આ જમા પાસુ લાગે છે. દહેજ ખાતે તો ખાસ કેમીકલ પોર્ટ પણ બનાવવામાં આવ્યું છે.